雲南遊記 Grad Trip 難忘之旅

小編總共去左12日雲南，旅程之前不停有人恐嚇我會好危險，又會俾人呃哂啲錢啦…...下刪幾千字~ 但其實除左第一日有啲小意外，其他日子都係滿滿嘅感動同美好回憶!

第一站 : 大理

大理最出名嘅景點係古城ˎ 洱海同蒼山。對於呢幾個景點我並沒有太大嘅評價，本來黎呢度係想睇下洱海， 但可能由於天氣唔太好，個海比我感覺好普通… 相都冇影太多~ 我盡左能力捕捉佢最靚嘅一面!

第二站 : 麗江

麗江可以話係旅程嘅中心點，去瀘沽湖同香格里拉都由呢度出發。麗江雖然已經變到好商業化，但未去過點都會想去一探究竟!

去麗江其中一個重點就係上玉龍雪山! 因為我未見過雪，今次仲要係雪山就更加二話不說就衝去。坐車遠觀雪山嘅時候已經覺得好靚好靚，雪山配藍天簡直就係一幅畫咁~ 係一定要親歷奇景先會感受到當中嘅震撼!

去玉龍雪山我參加左當地一日團 。第一站就去左甘海子，只係停留左十分鐘影左幅相, 之後就到藍月谷，上網睇相啲水係冰藍色，而我去到睇係帶寶石嘅綠色，水非常清，清可見底。

終於到重頭戲“上雪山”! 事前導遊提醒可能會高山反應，比左枝氧氣我地。剛剛上去其實都冇咩特別感覺，上到去就突然比較攰同眼訓。親眼見到呢個景真係好興奮，仲要落左雪，雖然天氣不是十分好，但我已經沈醉在呢遍潔白嘅雪景中!

另外兩個好出名嘅古鎮 : 麗江古城同束河古鎮。都係一般遊客必到行街食買玩嘅地方，所以唔作詳細介紹啦!

第三站 : 瀘沽湖

整個行程中我最最最中意嘅地方! 真係有一種治癒心靈嘅感覺，瀘沽湖好大好靚。天氣好嘅時候真係求其影都可是影到好似明信片咁靚! 另一個當地一日團去環湖仲有摩梭族嘅屋企參觀, 了解下佢地嘅文化，當地人好純樸又熱情好客，希望佢地嘅文化可以保存，唔會因為發展旅遊業而變成另一個麗江, 參觀完都有推介當地嘅特式銀器, 但都冇強迫消費，一日團最後一站去到篝火晚會大家一齊跳下舞，睇當地人點表達愛意，整體成個Tour都算好豐富! 值得推介!

第四站 : 香格里拉

黎到香格里拉已經有海拔三千幾米，陸續有人會有高山反應。而我都有啲頭痛，食過一次紅景天就冇事啦! 勁! 據當地人講，五月份天氣比較反常，以為晴天但過一陣又可以落雨。 第一日去到天陰陰，真係人都灰灰地，參觀左虎跳峽同有小布達拉宮之稱嘅松贊林寺，有嚮導沿途講解，對佛教嘅認識都加深左。

普達措國家公園，聽講花季或者紅葉季節會更加靚，但今次5月去就未係時侯, 感覺有啲同行城門水塘差唔多咁...... 所以大家最好選啱時間去。

第二日去到依拉草原納帕海，天氣好好，有好多牦牛做背景，影靚相真係話咁易呀!

最後一站 : 飛來寺

好多人黎都係想入雨崩，見識下傳說中嘅世外桃園。但因為我地能力有限，又怕時間唔夠，所以本身坐咁耐車入黎都只係想睇日照金山! 只可惜我地運氣唔夠睇唔到，鳴鳴! 但我都有影到雪山配星空，都算不枉此行!