入鄉隨俗：亞洲各國新年習俗知多D

哇哇哇！新年快到了！唔知你又有無外遊計劃呢？亞洲區好多地方都有過農曆新年嘅習俗，但因應各地風俗、歷史嘅不同，而有少少分別和特色。

去旅遊想玩得更地道，就要入鄉隨俗，知道各地各國嘅新年習俗啦！

韓國

韓國歷史和文化深受中國文化影響，所以韓國人同我地一樣，都相當重視新年呢一個節日，新年前韓國人會準備好多禮物送比唔同嘅親友，仲會預備祭祀所需要既物品。

至於食方面，年糕唔係人人岩，不過韓國人就一定岩！係韓國年糕湯有寓意長大一歲既意思，韓國人過年一定會準備好新年必食嘅年糕湯，多數會係祭祀結束後享用！

日本

熟悉日本文化嘅朋友可能會知道，日本嘅新年係計新曆而唔係計農曆！

日本人新年必做嘅事，一定唔少得去祈福。日本多神社寺廟就眾所周知，而新年前幾日更係人頭湧湧，日本人會去神社寺廟為新既一年祈福或者還願等等。

日本人新年期間一連三日唔開爐，所以都所有食物都要係新年前預備好，呢個就係所謂嘅「御節料理」。傳統做法已經由以前嘅五層漆盒縮短到三層，當中食物包括：鯖魚卵、魚乾、黒豆、蝦同紅白膾等等。

泰國

泰國新年又叫做宋幹節，又即係潑水節，係每年嘅四月上旬舉行。佢地會互相潑水去表達祝福，寓意消除一年所有嘅邪惡同不幸。

泰國人新年冇話有啲咩特色食物，但多數都會比平時更加豐富同埋會準備多幾份食物比和尚。

寮國

寮國嘅新年同泰國一樣都係四月舉行，又名浴佛節，而且一樣都會互相潑水慶祝，寮國人會係街上跳寮國土風舞──南旺舞慶祝。同泰國一樣佢地都係冇咩特色傳統食品。

新加坡

新加坡多華人聚居，所以當地嘅農曆新年氣氛都十分濃厚，新加坡人嘅過新年方法有少少似香港人，一樣會準備禮品送禮，又會整年糕同準備好多食物迎接新年。

新年食品當中最出名嘅就係「撈魚生」，即係係各色生魚片上放上有不同吉祥寓意嘅蔬菜，再淋上金桔汁。新加坡人仲會一路食一路講吉祥說話，表示撈得愈高愈吉祥。

印尼

印尼嘅新年日子每年都有所不同，當地嘅開齋節就相等於我地既新年，而日子就會係每年齋戒月結束之後。齋戒月入面教徒由日出到日落之前都唔能夠進食同飲水，藉此克制肉體的欲望同滌淨心靈。而當中常見既開齋食品有椰棗、用香蕉、蕃薯同紅糖製作而成既糖渣等。

蒙古

蒙古嘅新年叫「查幹薩日」，又叫「白月」。蒙古嘅新年著重對年長者嘅尊敬同家庭團聚。蒙古人新年前都會準備各色各樣嘅食物，特別係一種用羊肉做餡，外觀好似水餃嘅「波子」，仲有奶米粥、葡萄乾、奶酪、奶酒等，係比較有當地特色嘅新年食品！

越南

越南人同我地一樣都係跟農曆過新年，新年之前都會進行大掃除同準備好禮物同紅包。當中準備嘅食物包括傳統嘅方形越南粽子。（越南粽子嘅方形有天圓地方之意）

其次仲會準備桃花、金橘盆景同“五果盆”。桃花同金橘都有吉利既寓意，而五果盆就用於供奉祖宗。